Die Toortsie het ‘n houding

So ewe! Sy, my eie Toortsie, toer die hele wêreld vol en dit sonder my! Ek hoop darem sy laat haar liggie skyn daar waar sy gaan!

Sedert Toortsie se Bantingboerekos op 16 Desember 2015 haar verskyning gemaak het, het die wiele behoorlik gerol. Tot dusver was sy eintlik nog net op Agulhas, Struisbaai en Bredasdorp in winkels beskikbaar, die res is per posbestelling.

Tydens die Struisbaaise Kersmark het sy besonder goed verkoop en hierdeur het sy al redelik wyd in die land getoer. Party mense het my sommer op straat voorgekeer vir ‘n boek, ander het by my huis ‘n boek kom haal. Groot organisasie het soms gebeur sodat ‘n boekie by iemand kon uitkom.

Dit sal ook binnekort beskikbaar wees by Die Kunshuis, Clanwilliam.

Die lekkerste lekker is natuurlik as ek, uit die bloute ‘n oproep kry van iemand wat ‘n boek wil hê, maar nog lekkerder, is as ek, onverwags, ‘n sms kry met ‘n foto van waar Toortsie orals toer. Die posbestellings het in die begin baie stadig gegaan. Aanvanklik kon mense slegs deur Paypal bestel, wat party mense ontmoedig het. Hoe kan boerekos dan in Dollars betaal word? Dit lyk my noudat die mense begin terugkeer huis toe, begin dit makliker raak om met hul rekenaars ‘n bankoorplasing te doen. Bestellings kan ook deur BidorBuy gedoen word. Hierdie pakkies wag om gepos te word. 🙂

Hierdie Toortsies is op pad na die Midde Ooste, terwyl ‘n paar Toortsies eersdaags ook ‘n geleentheid sal kry na die Nederlande.

Groot dinge het gebeur sedert hierdie dag wat ek die proef in my hand gehou het.

En hier het ek die dag by Struisbaaise kersmark gestaan en besef ek moet daar weg, my senuwees sou dit nie hou nie. Dit was die heel eerste dag. Hoekom vat die man die boek, kyk daardeur, sit hom terug, vat hom weer, sit hom terug? Dan kom ‘n ander een en, woeps, in sy mandjie! Dis om van gek te word!  🙂

Die bekendstelling van die boek was ook ‘n nuutjie vir my.

Ek kyk redelik uit vir winkels regoor die land wat graag as versprydingspunte sal wil dien. Kontak my gerus asb. Of as jy dalk voel om as agent op te tree? Ek hoor graag van jou! Dit sal binnekort ook beskikbaar wees in Hermanus, by Ally Shoes. Hou ons blad dop.

Sommer nog Toortsies wat rondtoer: In Amerika, Australië, in Suid-Afrika!

Ag, dis tog só opwindend!

Mooi loop, my Toortsiekind,

Toorts

Ns. Danksy ‘n sekere blogmaatjie is Toortsie nou ook op pad na … New Zzzzzzz 🙂

BESTEL TOORTSIE SE BANTINGBOEREKOS HIER.