Skinderstories

‘n Vriendin is ontsteld omdat dieselfde skinderstorie oor haar uit verskillende monde, deur dieselfde oorspronklike mond versprei, by haar uitgekom het.

Kyk, die een wie die oorspronklike storie versprei het, se mond moet met Sunlight Seep uitgespoel word, maar wie se nekke ek wil omdraai, is hulle wat, goed bedoelende, die storie kom aandra het. Ek wonder baie keer of die “aandraers” nie meer skade doen as die oorspronklike skinderbek nie.

Jare gelede is ek deur die plaaswerkers beskuldig dat ek ‘n growwe skinderstorie versprei het, wat natuurlik nie waar was nie. Ek het met hulle oor 2 goed gepraat, wat vermeng is in een totaal onwaar, gruwelike storie. Ek was woedend en het almal ingeroep en hard en duidelik die ware toedrag van sake vertel, en ook dat ek nie tot daar sal daal waarvan hul my beskuldig nie.

Wat maak jy in so ‘n geval? Probeer jy dit regstel? Gaan praat jy met die een wat die storie versprei? Is dit dalk meer olie op die vuur?

So ‘n storie kan jou baie seer maak. Sommer hartseer, maar ook sosiaal seer. So ‘n storie het gewoonlik “iets” van die waarheid in, wat heeltemal buite verband geruk is.

Dalk moet ‘n mens tog, as dit dan nou vir jou oorvertel is, luister daarna en werk maak daarvan AS DIT NODIG IS. Dit reg leef, soos ‘n vriendin voorgestel het. Jy weet wat jy weet, en deur dalk nie te veel te reageer nie, loop die storie sommer dood. Ek het dit al gedoen, dit dood geleef, omdat mense ook glo wat hul sien.

Karring jy te veel daaraan, is dit soos wind in ‘n vuur, dán loop die storie sommer behoorlik, want die skinderbekke kan weerskante dophou!

Party stories kan regtig skadelik wees.

Hierdie is dalk nie so ‘n seermaakstorie nie. Ons hele gesin is een keer Australië toe om by die familie te gaan kuier. Dit was in die tyd wat hier so ‘n uittog van Suid-Afrikaners was. Vier dae voor die tyd hoor ek dat ons emigreer, altans, dis hoe die storie loop.

“Toevallig” kom die bron van die storie daardie selfde oggend by ons kantoor ingestap. Ek bied vir hom koffie aan, en terwyl ek dit maak, babbel ek onophoudelik. Ek vertel hom dat my man so ‘n fantastiese werk by ‘n boer in Aussieland gekry het, en dat die juweelmaatskappy wie se juwele ek op daardie stadium gesmous het, gevra het dat ek ‘n tak in Australië moet gaan oopmaak. En ek las aan. Die arme man! :shock: Hy het nie ‘n woord ingekry nie! Hy het net sy koffie vinnig gesluk en is daar uit. ;)

Ek bel my man net daar en vertel hom die storie. Net soos dit nou maar moet wees, loop manlief hom net daarna raak en borduur voort, vertel van die boerdery, ens…

Nou ja, ons is hier weg, en wat van die storie geword het, weet ek tot vandag toe nog nie. Maar die ou het ‘n Groot Storie gehad om te vertel, soos gehoor uit die perd se bek. :)

Ons móét maar versigtig wees met wat by ons monde uitgaan, veral as dit oor iemand anders is… goedbedoeld of te nie.

Toorts

Ek plaas oulike bloginskrywings op ons Faceboekblad. Loer gerus daar.

Hoe kan tieners ‘n paar rand verdien?

Die vraag op Google was: “Hoe kan tieners vinnig geld maak.” Oor die vinnig geld maak het ek klaar gepraat.

Maar hoe moet ‘n tiener maak om ‘n inkomstetjie (of inkomste dalk) te verdien? Baie tieners kyk in die vakansietyd uit vir ‘n werkie.

Met my outydse, plattelandse kop kon ek aan ‘n paar goed dink, julle moet dit asb aanvul. Asseblief, hierdie is nie ‘n werksoekblog nie. Ons ruil net idees uit. 

By die vakansieoorde is ‘n verskriklike behoefte aan BETROUBARE helpers in die vakansie. Die plaaslike mense is net nie genoeg om die stormloop van mense te hanteer nie. So, klop aan by haarkapsters, restaurante, winkels en hoor wat hulle aan te bied het. Wees bereid om ‘n minder lekker werk te doen. 

  • Kelnerwerk by restaurante
  • Kassiere (till slaan) in winkels
  • Sakke pak
  • Algemene stoorwerk, soos om bokse te dra, rakke uit te pak, vragte te help aflaai
  • Petroljoggie
  • Hulp by haarsalon. Help hare was, gee rollers aan, antwoord die telefoon
  • As jy regtig entrepeneuries is, wat van ‘n roomysstalletjie, hotdogstalletjie, koeldrankstalletjie, pizzastalletjie by die see, of daar waar die vissersbote uitkom deur die dag?
  • Of wees soggens 4 uur by die hawe met warm koffie en toebroodjies as die bote uitgaan see toe. Baie van daardie mense het verslaap en kon nie betyds eet en kos inpak nie en sal só bly wees vir ietsie wat hulle kan gryp in die hardloop.

Gaan julle nie see toe nie? Met die binneland wat so leeg loop tydens vakansietye, glo ek ook dáár sal behoefte aan gewillige en betroubare werkers wees.

  • Help versorg ‘n ou mens.
  • Pas iemand se huis op terwyl hulle weg is. Kyk dat dielfde lig nie heeltyd brand nie, dat die koerant en melk opgetel word soggens, dat die diere kos en oefening kry, die erf netjies is. Kyk dat die vrieskas en yskas loop ná ‘n kragonderbreuking.
  • Sny mense se gras.
  • Ook in die binneland sal hulle kassiere en sakpakkers nodig hê in die winkels. Dalk het hulle iemand nodig wat kan help groente weeg vir die klante.
  • Lewer koerante af.
  • As jy al ver gevorder het op skool en rekeningkundige werk kan doen, kan jy selfs met die administratiewe werk help. Dalk is daar ‘n kleinerige kafee wie se admin in chaos is. Bied aan om dit te help regruk, en bied sommer aan om deur die jaar dit ook te doen so een maal per week.

Liewe tiener, dit maak nie saak WAT jy doen om ‘n geldjie te maak nie. (Moet asb net nie jou siel verkoop vir ‘n geldjie nie!) Doen dit wat jy doen, VOLUIT, met ‘n MOOI GESINDHEID en ‘n glimlag. LYK of jy wil werk. Wees BETROUBAAR. As daardie werkgewer sien hy kan op jou staatmaak, gee hy dalk vir jou ‘n meer uitdagende werk.

Geniet dit!

Toortsie

Tieners en jongmense, as die GELD nie so erg belangrik is nie, wat van ‘n UITREIK in die vakansie, waar jy iemand anders se lewe verryk?

En julle moet ook nie van SHADOW vergeet nie, waar julle julle werk aanbied en nie ‘n salaris verwag nie. Dit gee jou ONDERVINDING, iets wat almal nodig het om ‘n werk te kan kry.

Ns. Gaan loer bietjie op ons faceboekblad, word lid daarvan as jy wil en gesels saam.

Control freak?

Ek hoor dat ek ‘n control freak is en lê ‘n hele nag wakker daaroor. Ek? ‘n Control Freak? ‘n Beheervraat? Ek doen nogals baie selfinspeksie, maar hierdie een het my nog nooit laat wonder nie.

Ek vra op faceboek wat ‘n control freak is. Die antwoorde kom so stuk-stuk in…

1) As jy die een wil wees wat in beheer is van alles… Ja, ek weet dit is wat ‘n beheervraat is, maar val ek in daardie kategorie? Wat wel waar is, is as iets my verantwoordelikheid is, en die moeilikheid na my kant toe gaan kom, wil ek in beheer daarvan wees. Ek gee glad nie om as iemand anders in beheer is nie, maar dan wil ek nie die moeilikheid kry nie.

2) Wanneer jy wonder daaroor is dit klaar te laat!!! Haha lol   :shock: oeps… toemaar ek vat dit van wie dit kom, met ‘n knippie sout en al. :)

3) Jy is ‘n control freak wanneer dit ALTYD “your way” or “no way” is….  Nee, ek hoop nie dis ek daai nie. 

4) Wanneer my die nek is wat draai waarheen en wanneer jy wil… :roll: … nou kom jy darem naby aan die vel…  Ek sê jare gelede vir ‘n vriendin dat ek so bang is ek probeer my man beheer. Sy antwoord toe dat hy hom nie sal laat beheer nie. Net vir die rekord, hy is ‘n nommer 8, hoor! ‘n Uitstekende bestuurder. Maar ja, ek is soms die nek, kry dit nogals reg. Eintlik dink ek ek verdien ‘n medalje daarvoor! ;)

5) Wanneer mens eintlik ‘n freak is maar jou moet control tussen ander gewone mense.  As ek nou myself moet ontleed, dink ek, HIERDIE EEN is in die kol! :) Sien! Facebook maatjies weet die beste.

My vraag is: Wanneer is jy ‘n beheervraat? Die beheervrate waarvan ek die meeste weet, is sommige mammas wat hul kinders nie ‘n sekonde uitlos om self iets te waag nie. Trippel, trippel, trippel. Net in hierdie week het ek ‘n program op RSG gehoor: “Maak jy jou kinders groot, of laat jy hulle grootword?” … Ek is mos een vir die opvoeding. En weet julle wat sê die persoon? Presies wat ek glo: Jy moet jou kinders GRENSE leer. Ek sê altyd dis soos ‘n groot sirkel. Die grens is die sirkel. Daaroor trap jy NIE. Maar binne die sirkel mag jy maak net wat jy wil. Soos kinders ouer word, word die grense verder gestel, sodat, as hulle eendag groot is, hulle op hulle eie voete kan staan.

Is jy ‘n beheervraat as jy dit wat jyself opgebou het, met alle mag wil beskerm? Is jy ‘n beheervraat as jy nie ander op jou rekenaarprogramme toelaat nie omdat dit al soveel keer opgefoeter is deur ander? Is jy ‘n beheervraat wanneer jy dit werklik goed bedoel vir jou huwelik en jou gesin?

Ek sal graag wil hoor, wat dink julle, wanneer is jy ‘n beheervraat?

Groete

onbeheerdetoorts

ampergoedvoeldag 73

Dissipline – te veel of te min?

Sekuriteit vir kinders

Kinderveiligheid

woede… vrees… angs

Volgens die Ennegram en die kursus wat ons predikant met ons gedoen het, is die dryfveer wat ‘n persoon laat werk, óf angs, óf woede, óf vrees. Dit het vir my lank geneem om dié konsep te verstaan, en ek is steeds nie seker of ek dit regtig verstaan nie.

Die kopmense (5, 6, 7) word gedryf deur vrees, die hartsmense (2, 3, 4) deur angs, en die Gut-mense (8,9,1), deur woede.

Die angs een verstaan ek nie regtig nie. Die dominee wat dit aangebied het, is ‘n hartsmens, en sê dat hy angstig voel voor ‘n preek… hy preek fantasties… so, dit lyk my die angs werk vir hom. Vir my, die nommer 7, is angs ‘n verlammer. Alles in my vermoë moet gedoen word dat ek nie angstig raak nie, want dán is ek ‘n ronde nul op die kontrak.

Ek ken heelwat gut-mense, veral die nommer agts… uhm… oeeee, hulle floreer op woede! Maak hulle net kwaad, dan “perform” hulle! Moeilik.

Hoe meer ek oor die “vrees” een gedink het, hoe meer duidelik het dit vir my geword. Ja, ons het ‘n bangheid in ons geaardheid. Vrees beteken nie dat ek heeldag oor my skouer loer nie, dat ek paranoïes is nie, niemand vertrou nie. Vir my beteken dit dat ek voorkomend optree. Ek probeer binne die reëls optree, uit “vrees” vir gevang word buite die reëls, as julle verstaan wat ek bedoel.

Ek sien nie die “vrees” as ‘n negatiewe ding nie. Ek sal my bes doen vir my huwelik… omdat ek nie wil hê dit moet misluk nie. Dit beteken natuurlik nie dat ek NOOIT foute maak nie!! ;)

So kan ek aangaan en aangaan en aangaan oor wat ek eerder “reg” sal doen, omdat ek nie van die uitkoms hou as dit verkeerd is nie. Omdat ek bang is vir die uitkoms.  Byvoorbeeld. Probeer by die verkeersreëls hou, uit respek vir ander, maar ook omdat ek nie “lus” het vir ‘n verkeersboete nie. Ek glo ek is nou duidelik genoeg oor hierdie een.

Maar ‘n nommer 7 het ook eienskappe van ‘n 8. So… moenie my bedonderd maak nie. :(  Woede laat my ook produseer, soos as jy in die aand my te ver druk oor goed, sal ek in woede, met ‘n vreeslike lawaai, die heel nag wakker bly en daai goed sal môre-oggend op jou lessenaar wees… maar dis nie ‘n goeie ding nie. Dis ook baie ontstellend.

Watter een is jy? As jy regtig mooi dink, wat is jou dryfveer? Vrees? Woede? Angs?  Dit verg nogals baie eerlikheid en selfondersoek om by die antwoord uit te kom.

Groete

Toorts

halfpadgoedvoeldagnommer 72

Angs is ‘n verlammer

Kenmerke van ‘n nommer 7

Kopmense

 

 

Individu? Of groep?

In ‘n kursus wat ek doen, leer ek dat die groep, die familie in die Bybelse tye die alles was. Die individu was niks. As jy enigsins iets anders gedoen het as wat die groep voorskryf, was jy amper uitgeban uit die gemeenskap.

Saam met dit leer ek toe ook dat die individu vandag tel, dat die individu selfs belangriker as die gemeenskap is. ??? Sjoe??? Nee! Dit kan nie wees nie! In die stad miskien maar beslis nie op die platteland nie.

Of hoe?

Hoe meer ek daaroor dink, hoe meer besef ek dis waar. Dis waar in my eie lewe! Dis waar in myself!

Vir al my getroude lewe, veg ek vir die “ons”. “Ons” wat dinge saamdoen. Die “ons” wat belangriker is as die “ek”… tot ek agterkom dat hierdie ek, ekself, al BAIE individualisties geraak het. Soveel so dat ek dink ek sal kan aard as ‘n kluisenaar!

Byvoorbeeld: Dit was en is steeds vir my sleg as my man alleen van die huis af weggaan. Nou gaan ek sowaar sonder hom met vakansie! :shock:

Vir jare het ek geSMAG na die kunste, om na die Artscape te gaan en goed te gaan kyk. My man hou regtig nie daarvan nie. Tot ek besef het dat ek nie aan hom vasgebind is nie. Ek en my kinders wie wel daarvan hou, kan op ons eie gaan! Ons woon die Saterdagmiddag vertoning by, wat meebring dat ek vanoggend by die huis kan vertrek en vanaand, net na donker, is ek terug! :) Hoe moeilik kan dit wees?

Ek het geleer dat, as ek wil gaan draf (in die ou dae) of stap, ek my moeg moet soek vir maats om dit saam met my te doen, dan moet ek hoeveel kilometers ry tot by die maats, en dan stap ons. Is ek of een van hulle nie lus nie, val dit deur dit mat. Nee wat. Hoekom vir ander wag? Ek doen niemand skade aan deur my eie ding te doen, te gaan stap wanneer dit my pas, op my eie tyd, my eie pas, so ver ek wil nie, en weet julle wat? Ek geniet dit!

Vroeër jare het ek baie goed by my laat verbygaan omdat ek nie iemand kon vind wat dit saam met my doen nie.

Ek hoop nie ek trap nou op iemand se tone nie, dis nie die bedoeling nie. Maar ek het net nou die dag ‘n interessante gesprek van bloggers van ‘n ander webwerf gevolg. Lyk my daar is probleme op daardie webwerf. Moet ons of moet ons nie skuif nie? Hoe gaan ons die ander oortuig kry om te skuif, want ons moet ALMAL skuif… Interessant…

Doen jou ding! Solank jy nie ander benadeel in die proses nie.

Lees: Who moved my cheese.

Toorts

Lekker dag 71

Begin ‘n nuwe blog

Hoe verander ek aan ‘n skrywe wat ek reeds gepubliseer het?

Waar kry ‘n mens die ander bloggers?

Die kuns van tag